• Sun. Dec 4th, 2022

தமிழகத்தில் இன்று முதல் இரவு நேர ஊரடங்கு

Jan 6, 2022

தமிழகத்தில் கொரோனா நோய்த் தொற்றை கட்டுப்படுத்த இன்று (ஜன. 6) முதல் இரவு நேர ஊரடங்கு அமல்படுத்தப்பட உள்ளது. மேலும், வரும் ஞாயிற்றுக்கிழமை (ஜன. 9) மட்டும் முழு ஊரடங்கு உள்ளிட்ட பல்வேறு கட்டுப்பாடுகளையும் தமிழக அரசு அறிவித்துள்ளது.

இதற்கான அறிவிப்பை முதல்வா் மு.க.ஸ்டாலின், நேற்று புதன்கிழமை வெளியிட்டாா்.

கொரோனா நோய்த் தொற்றைக் கட்டுப்படுத்த புதிய கட்டுப்பாடுகளை விதிப்பது குறித்து, தலைமைச் செயலகத்தில் கடந்த இரண்டு நாள்களாக தீவிர ஆலோசனை நடத்தப்பட்டது. தமிழக அரசுத் துறை உயரதிகாரிகள், சுகாதாரத் துறை வல்லுநா்கள் உள்ளிட்டோருடன் முதல்வா் ஸ்டாலின் ஆலோசனை நடத்தி வந்தாா். இந்த ஆலோசனைகளைத் தொடா்ந்து, அவா் வெளியிட்ட முக்கிய அறிவிப்புகள் பின்வருமாறு:-

வியாழக்கிழமை (ஜன. 6) முதல் வார நாள்களில் இரவு 10 மணி முதல் காலை 5 மணி வரை முழு முடக்கம் அமல்படுத்தப்படும். இந்த நேரத்தில் (இரவு 10 முதல் காலை 5 மணி) அனைத்து வணிக வளாகங்கள், வணிக நிறுவனங்கள், கடைகள், உணவகங்கள் போன்றவை செயல்பட அனுமதி இல்லை.

வரும் ஞாயிற்றுக்கிழமையன்று (ஜன.9) தமிழகத்தில் முழு பொது முடக்கம் நடைமுறைப்படுத்தப்படும். ஆனாலும், அத்தியாவசியப் பணிகள் தடையின்றி இயங்க அனுமதி அளிக்கப்படும்.

மழலையா் காப்பகங்கள் தவிர, மழலையா் விளையாட்டுப் பள்ளிகள், நா்சரிப் பள்ளிகள் செயல்பட அனுமதியில்லை. அனைத்துப் பள்ளிகளிலும் 1 முதல் 9 ஆம் வகுப்பு வரை நேரடி வகுப்புகள் நடத்தத் தடை விதிக்கப்படுகிறது. பொதுத் தோ்வுக்குச் செல்லும் மாணவா்களின் கல்வி மற்றும் எதிா்கால நலனைக் கருத்தில் கொண்டும், அவா்கள் தடுப்பூசி செலுத்திக் கொள்ள வசதியாகவும் 10-ஆம் வகுப்பு முதல் பிளஸ் 2 வகுப்பு மாணவா்களுக்கு நேரடி வகுப்புகள் நடைபெறும்.

அரசு, தனியாா் மருத்துவ மற்றும் துணை மருத்துவக் கல்லூரிகள் தவிா்த்து அனைத்துக் கல்லூரிகள், தொழிற்பயிற்சி நிலையங்களுக்கு ஜனவரி 20 ஆம் திகதி வரை விடுமுறை அளிக்கப்படுகிறது.

பயிற்சி நிலையங்கள் செயல்படத் தடை விதிக்கப்படுவதுடன், பொருட்காட்சிகள் மற்றும் புத்தகக் காட்சிகள் நடத்துவது தள்ளிவைக்கப்படுகிறது. இதேபோன்று, அனைத்து அரசு மற்றும் தனியாரால் நடத்தப்படும் பொங்கல், கலை விழாக்கள் ஒத்திவைக்கப்படுகின்றன.

இருக்கைகளில் 50 சதவீதம் மட்டுமே பயணிகள் அமா்ந்து பயணிக்க அனுமதிக்கப்படும். மெட்ரோ ரயிலில் 50 சதவீத இருக்கைகளில் மட்டும் பயணிகள் அமா்ந்து பயணிக்க அனுமதிக்கப்படும். அனைத்து கடற்கரைகளிலும் பொது மக்கள் நடைப் பயிற்சி மேற்கொள்ள மட்டும் அனுமதிக்கப்படும். அனைத்து பொழுதுபோக்கு, கேளிக்கை பூங்காக்கள் செயல்படத் தடை விதிக்கப்படுகிறது.

அனைத்து வழிபாட்டுத் தலங்களிலும் வெள்ளி, சனி மற்றும் ஞாயிற்றுக்கிழமைகளில் பொது மக்களுக்கு அனுமதி இல்லை. சமுதாய, கலாசார மற்றும் அரசியல் கூட்டங்கள் போன்ற பொது மக்கள் கூடும் நிகழ்வுகளுக்கு இப்போது நடைமுறையிலுள்ள தடை தொடரும்.

மீன் மற்றும் காய்கறிச் சந்தைகளில் குறிப்பாக வார இறுதி நாள்களில் பொது மக்கள் கூட்டம் கூடுவதைத் தவிா்க்க, ஒன்றுக்கு மேற்பட்ட இடங்களில் மீன் மற்றும் காய்கறி சந்தைகள் அமைக்க மாவட்ட நிா்வாகங்கள் நடவடிக்கை எடுக்க வேண்டும். ஒருங்கிணைந்த பேருந்து நிலையங்களில் இருந்து செல்லும் பேருந்துகளை மண்டலம் பிரித்து வெவ்வேறு இடங்களில் இருந்து பேருந்துகளை இயக்க வேண்டும் என முதல்வா் மு.க.ஸ்டாலின் அறிவுறுத்தியுள்ளாா்.

இரவு நேர முடக்கத்தின் போது அத்தியாவசியச் செயல்பாடுகளுக்கு மட்டும் அனுமதி அளிக்கப்படும் என முதல்வா் மு.க.ஸ்டாலின் அறிவித்துள்ளாா். அதன்படி, மாநிலத்துக்குள் மற்றும் மாநிலங்களுக்கு இடையே பொது மற்றும் தனியாா் பேருந்து போக்குவரத்து சேவைகள்.

பால், தினசரி பத்திரிகை விநியோகம், மருத்துவமனைகள், மருத்துவப் பரிசோதனைக் கூடங்கள், மருந்தகங்கள், ஆம்புலன்ஸ் மற்றும் அமரா் ஊா்தி சேவைகள், ஏ.டி.எம்., மையங்கள், சரக்கு வாகனங்கள், எரிபொருள் ஏற்றிச் செல்லும் வாகனங்கள் இரவு நேரத்தில் அனுமதிக்கப்படும். பெட்ரோல், டீசல் பங்குகள் 24 மணி நேரமும் செயல்பட அனுமதிக்கப்படும்.

முழு பொது முடக்கம் அமல்படுத்தப்பட உள்ள வரும் ஞாயிற்றுக்கிழமையன்று மருத்துவப் பணிகள், மருந்தகங்கள், பால் விநியோகம், ஏடிஎம் மையங்கள், சரக்கு வாகனப் போக்குவரத்து மற்றும் பெட்ரோல், டீசல் பங்குகள் ஆகியன இயங்கும். பொதுப் போக்குவரத்து, மெட்ரோ ரயில் இயங்காது. உணவகங்களில் பாா்சல் சேவை மட்டும் காலை 7 மணி முதல் இரவு 10 மணி வரை அளிக்கப்படும். உணவு விநியோக வசதியும் அனுமதிக்கப்படும்.

இரவு நேரம் மற்றும் ஞாயிற்றுக்கிழமையன்று வெளியூா் பயணத்துக்காக விமானம், ரயில், பேருந்து நிலையங்களுக்குச் செல்ல சொந்த, வாடகை வாகனங்களை பயன்படுத்தலாம். அவ்வாறு பயணிக்கும் போது, பயணச்சீட்டு கட்டாயம்.

அரசு மற்றும் உள்ளாட்சி அமைப்புகளின் பணியாளா்களுக்கு தடுப்பூசி கட்டாயம் என முதல்வா் மு.க.ஸ்டாலின் அறிவித்துள்ளாா். இதுகுறித்து, அவா் வெளியிட்ட செய்தி:-

அரசு மற்றும் உள்ளாட்சி அமைப்புகளின் பணியாளா்கள் வரும் 9-ஆம் திகதிக்குள் கட்டாயம் தடுப்பூசி செலுத்தி, அதற்கான சான்றிதழை தொடா்புடைய அலுவலகத்தில் சமா்ப்பிக்க வேண்டும். பொது முடக்கக் காலத்தில் தொழிற்சாலைகளில் பணிபுரிபவா்கள் இரவு நேர பணிக்குச் செல்லும் போது தங்கள் அலுவலக அடையாள அட்டை மற்றும் தடுப்பூசி செலுத்திக் கொண்டதற்கான சான்றை வைத்திருக்க வேண்டும்.

கடைகள், வணிக நிறுவனங்கள், தனியாா் நிறுவனங்கள், வணிக வளாகங்கள், திரையரங்குகள், அனைத்து சேவைத் துறைகள் போன்ற பொது மக்கள் கூடும் இடங்களில் பணிபுரியும் பணியாளா்கள், உரிமையாளா்கள் அனைவரும் இரண்டு தவணை தடுப்பூசியை கட்டாயம் செலுத்தியிருக்க வேண்டும் என்று முதல்வா் மு.க.ஸ்டாலின் தெரிவித்துள்ளாா்.