இந்தியா- இங்கிலாந்து இடையேயான 4-வது டெஸ்ட் போட்டி லண்டன் ஓவல் மைதானத்தில் நடைபெற்று வருகிறது.
டெஸ்ட் போட்டியின் முதல் இன்னிங்சில் இந்திய அணி 191 ரன்களுக்கு ஆல் அவுட் ஆனது.
இதையடுத்து, முதல் இன்னிங்சை துவங்கிய இங்கிலாந்து அணி 84 ஓவர்களில் 10 விக்கெட் இழப்புக்கு 290 ரன்கள் எடுத்தது. இங்கிலாந்து அணி இந்திய அணியைவிட 99 ரன்கள் முன்னிலை பெற்றது.
இதையடுத்து, 2 வது இன்னிங்சை துவங்கிய இந்திய அணி நிதான ஆட்டத்தை வெளிப்படுத்தியது. விக்கெட்டுகளை இழந்து விடக் கூடாது என்பதில் மிகவும் கவனம் எடுத்து விளையாடிய ரோகித் சர்மாவும், கே.எல் ராகுலும் பொறுப்புடன் விளையாடினர்.
2-ஆம் நாள் ஆட்ட நேர முடிவில் இந்திய அணி விக்கெட் இழப்பின்றி 43 ரன்கள் சேர்த்தது.
ரோகித் சர்மா 20 ரன்களுடனும், கேஎல் ராகுல் 22 ரன்களுடனும் களத்தில் இருந்தனர்.
இந்நிலையில், 3-வது நாள் ஆட்டம் இன்று நடைபெற்று வருகிறது. ஆட்டம் தொடங்கியது முதலே இரு வீரர்களும் பொறுப்பான ஆட்டத்தை வெளிப்படுத்தினர். 46 ரன்கள் எடுத்திருந்த நிலையில் கேஎல் ராகுல் வெளியேறினார்.
அதன்பின்னர் புஜாராவுடன் ஜோடி சேர்ந்த ரோகித் சர்மா சிறப்பான ஆட்டத்தை வெளிப்படுத்தினார்.
இங்கிலாந்து வீரர்களின் பந்து வீச்சை சிதறடித்த ரோகித் சர்மா சதம் விளாசினார். 100 ரன்களை கடந்து சிறப்பாக விளையாடி வருகிறார். வெளிநாட்டு மண்ணில் ரோகித் சர்மா அடிக்கும் முதல் சதம் இதுவாகும்.
தற்போதைய நிலவரப்படி இந்தியா தனது இரண்டாவது இன்னிங்சில் 1 விக்கெட் இழப்பிற்கு 197 ரன்கள் எடுத்துள்ளது.
இங்கிலாந்தை விட 98 ரன்கள் முன்னிலையில் இந்தியா உள்ளது. ரோகித் சர்மா 101 ரன்களுடனும், புஜாரா 48 ரன்களுடனும் களத்தில் உள்ளனர்.